هآخد بعضى وأمشى

لأن صوتهم مكتوم

خلاص مابقتش عارفة أعيش معاهم

!.....وأشوف وشوشهم كل يوم

..

هو احنا قاعدين مع بعض ليه..؟

و عايشين فى مكان واحد

ايه اللى بيربطنا ببعض

اذا كان كل واحد قافل على نفسه

و مش مسموح للتانى يعرف أى حاجة عنه

..!!كل حاجة بتحصل ف السر

الصح والغلط

.وكل واحد عارف ان التانى بيغلط وساكت

.وعامل مش واخد باله

..زهقت من الحياة دى بجد زهقت

..ساعات أصحى م النوموأشوف حد منهم قدامى

!!"وألاقينى بأسأل نفسى "مين ده؟! وليه أنا عايشة هنا مع دول بالذات؟

...أنا والله العظيم بحبهم
بس ولا هما قادرين يفهمونى
ولا أنا عارفة أتعامل معاهم
!!ليه كل واحد أصبح عالم غامض لوحده

...بيبكى لوحده وبيفرح كمان لوحده

بس البكا زاد أوى اليومين دول

يمكن ده سبب انى من يومين كده
!كنت سامعة صوت بكا مكتوم بليل

ماأعرفش مصدره

صوت بيبكى جواه

..بس مش قادرة أحدد صوت مين فيهم

..الصوت ده بيرعبنى

ومن كتر ما احنا بعاد عن بعض

..!!!بقيت أتكسف أسأل حد منهم اذا كان ده صوته وللا لأ

أو يمكن يكون بيتهيألى

..!!ويكون الصوت ده مجرد خيال

..!وأكون أنا اتجننت

.يمكن كمان يكون صوتى

...

.كل يوم بيزيد احساسى انى ماأعرفهمش
...وأكيد هما مايعرفونيش
ماادونيش فرصة انهم يعرفونى
خلاص مابقاش يهمنى دلوقتى
...يعرفونى أو مايعرفونيش مابقتش مشكلة
..
....
..ولأن صوتهم مكتوم

ولأنى مش عايزة أكون زيهم
...فأنا عايزة أمشى من هنا

....وأروح هناك

نفسى أمشى بأه

آخد بعضى وبس و أمشى

..
....

هأمشى

..