"ا"ومخبى لروحى كلام فى روحى.. وروحى ماتخبيش
.عارف انى ساعات وانا قاعدة لوحدى كده الاقينى باكلمك.. بتسمع؟ اصلك عمرك مارديت
مع انى وانا قاعدة معاهم ف الغالب باكون ساكتة.. ماباقولش.. مش بابقى متضايقة منهم ولا حاجة او مش عايزة اتكلم معاهم.. ابداً.. بس انا يمكن ماباعرفش افتح مواضيع للكلام.. دماغى مابتسعفنيش.. يعنى ابقى عايزة اتكلم ف مواضيع كتير معاهم بس آجى وانا معاهم وانسى.. يمكن السبب الاهم انى باستمتع بالصمت.. المهم ابقى قاعدة مع ناس باحبهم حتى لو معظم الوقت ساكتين. عارف بقيت احس انه عبء عليا لما باقعد مع مجموعة او حتى حد واحد مش واخدة عليه اوى انى باقعد طول الوقت ادور على كلام اقوله عشان ميقولوش عليا مملة..او انى مش مبسوطة من القعده مثلاً.. بس انا لو مش مبسوطة هقوم ..هاقعد ليه مع ناس ماباحبهمش.. لو كلهم يفهموا كده.. (ساعات باحس انه مش مهم يفهموا كده مادام انت فاهم. انت فاهم؟) ا ا
امبارح صحيت ايديا اليمين واجعانى بغباء.. كأنها مخبوطة.. قعدت احكيلك..(معرفش سمعت ولا ايه) .. لقيتنى باطبطب عليها -بايديا الشمال طبعاً- واقولها معلش.. ماكانتش واجعانى اد ما كانت زعلانة عشانها...حسيت انى المفروض اعاملها كجزء منفصل.. تعبان لوحده. ا
معرفش ليه ساعتها فكرت "يا ترى مين زعلان منى دلوقتى؟" ا
اليومين دول آخر يومين ف الجامعة..عندى حالة قرف.. مش عشان هاسيب الجامعة طبعاً.. بس حاسة اوى انى باكبر.. باكبر كتير كده وفجأه.. خايفة على فكرة.. وعمرى ماكنت خايفة زى دلوقتى.. الامتحانات ف العادى عمرها ماكانت شئ بيقلقنى.. بس دى آخر امتحانات وآخر سنه.. خايفة اخلص واتخرج واترمى ف الشارع.. حاجة كده زى احساسك انك فاضلك زلطة وتطلع بره.. خايفة ماعرفش اعمل اللى انا عايزاه.. وخايفة اعرف اعمل اللى انا عايزاه وابدأ فيه وبعد كده اكتشف ان مش هو ده اللى انا كنت عايزاه ومش ده اللى باحبه واللى كان المفروض اعمله.. والاقينى ف مكان مش بتاعى..
انا باتكلم معاك كتير اليومين دول ف الموضوع ده عشان تطمنى بأى كلمة هبلة.. بس مابيحصلش (مابتسمعنيش ولا مابتسمعش؟؟.. مش مهم)
استنى هقولك ع الخيبة الكبيرة بقى.. كل الحاجات اللى انا عايزة اعملها دى اصلاً اصلاً مش عايزة اعملها.. وعايز اعمل حاجات تانية خالص.. بس هى الدنيا بقى رمتنى هنا وخلتنى اعوز حاجات انا اصلاً مش عايزاها.. هيبقى كتير اوى عليا لو ماسمحتليش كمان اعمل الحاجات دى. ا
بس ف نفس الوقت انا فرحانة.. فرحانة اوى كمان.. وباذاكر وانا مبسوطة (وباقولك عشان افرحك معايا) .. حاسة انى هاخلص واخلص بقى.. اياً كان اللى هيحصل بعد كده.. اهو اى حاجة فيها تغيير.. يعنى الحياة هاتاخد شكل تانى.. غير الجامعة وتصوير الورق والمحاضرات والامتحانات.. مع ان كل الحاجات دى هتوحشنى.. وآخر يوم نزلت فيه الجامعة حسيت بحاجة غريبة ان "حتى الوشوش اللى ماعرفش اصحابها ،ولا كان ليا بيهم علاقة قريبة او بعيدة، هتوحشنى" ا
بقالى كام شهر ..كل فترة يعدى عليا يومين اصحى مش فاكرانى..او مش مصدقة ان انا انا.. واول مافتح عينيا وانا لسه ع السرير باخد دقيقة او اقل عشان اصدق ان انا هى انا..واربط العقل ده بالجسم ده بالبنى آدمة اللى عايشة ف البيت ده مع الناس دول .. بابقى حاسة انى مش لايقة عليا.. مابابقاش فاكرانى حد تانى.. بابقى "ولا حد" ..من اسبوع كده طول الوقت اللى نمته (نايمة صاحية كده) مش حاسة بيا انى انا.. ماكنتش حد خالص. لما باصحى وافوق وافتكر واصدق باتضايق اوى منى.. باتضايق انى جوايا بقيت رافضانى كده.. انا عمرى ما كنت كده.. كنت قابلانى بكل ما فيا.. ايه الجديد؟.. انا مش محتاجة طبيب نفسى ولا حاجة.. انا محتاجة احب نفسى.. ا
.اكتر
(حاسة انك سامعنى ومنفض)
واحشانى الحواديت اوى
كنت واقفة انا وماما امبارح ف المطبخ بنغرف الغدا.. كان بقالنا كتير ماعملناش حاجة مع بعض.. واحنا بنحط الاكل كنا بنهزر.. وانا اتريق على "الكركاديه بالتمر" اللى ماما هاريانا منه اليومين دول -ده باعتراف منها- .. وعلى محاولاتها لاقناعنا انه حلو ومفيد ..وانه بقى المشروب الرسمى ف البيت.. ونضحك انا وهى.. (طلع حلو على فكره..ونفسى ادوقك منه) .. ف وسط الضحك والكلام جه على بالى اقولها انى واحشانى الحواديت.. وانى جبت قصة "السلطان المسحور" ونزلت كام حلقة من الف ليلة وليلة.. بس برضو لسه الحواديت واحشانى ونفسى ف حدوته هى تحكيهالى.. وتبقى حدوته جديدة ماسمعتهاش قبل كده.. وانام ف نصها واكملها ف الحلم.. ا
لما دخلت عليا المطبخ ولقتنى مبتسمة اوى (من حالة الطفولة المتأخرة دى) ..وسألتنى: ايه ..بتضحكى على ايه؟
ضحكت وقلتلها : مفيش. ا
(صحيح..انت بتعرف تحكى حواديت؟)ا
23 comments:
يوتا تعرفي
كلمه بسسسسسسس
انتيييييييييي
برييييييييييييييئه
مووووووووووووووووووووت
بجد
و حلوه قوي الفضفضه دي
زيزي
لو ما سمعكيش فى دا كله يبقي .......
ولا بلاش ما يبقاش بس يمكن صوتك مكانش عالى :P
عارفه كمان ماما هريانا كركدية بالتمر بس انا بحب الكركدية لوحده مع انى دوقت ابو تمر لقيته حلو بس شكله مش حلو وانا مش بحب الحاجة اللى شكلها وحش
عارفه كمان
هيسمعك بعد م الكلية تخلص ويقل شوقك ليها ويبقي الشوق ليه لوحده:D
سلاماااااااااات
تشي أحمد
صحيح
انا بشرب كركدية بالتمر دلوقتى
يعععععععععععععععععع
صحيح كمان
اللينكات اللى انتى حاطها بتاع الفور شيرد بيستهبل او مش شغال ايهم اقرب للصواب
امي حكايتك الجديدة فمش راضي يحمل الفلاش
ليه معرفش
بس كدا
زيزى
..
يمكن التدوينه هى اللى بريئة
التدوينة جزء بس منى..
:))
بس ياريت اكون زى مابتقولى
سيبك المهم انتى عاملة ايه
؟
miss u
..
احمد
..
هو مين ده؟؟
انا شخصيا مش عارفة انا كنت باكلم مين
او مش عارفة اوى
يمكن كمان مش حد واحد او يمكن مش حد خالص
بس ف جميع الاحوال
لو ماسمعش يبقى.....
زى مانت قلت بالظبط
:))
طب يعنى الكركدية بالتمر ده طلع حاجة معروفة اهو
يعنى مش اختراع ولا حاجة
صعبت عليا على فكره ..انا مجربه وحاسه..والله لسه مخلصه كباية دلوقتى..غصب واقتدار برضو
:D
..
لا لا ماسمحلكش تشكك فى صلاحيه لينكاتى
انا منزله لحد دلوقتى تلت البومات منه وشغال وزى الفل
جربه تانى واصبر عليه عشان الفور شيرد بطئ او يمكن المشكله ف الحروف اللى عليها قطط دى
عموما ابقى قول ايه المشكله بالظبط
.
الحدوتة بقى افتحها ف
internet explorer
مش ال fire fox
ولو ماشتغلتش يبقى مشكله ف الفلاش عندك.. بس شغالة عندى.. حاول تجرب تانى عشان الحدوتة حلوة اوى بجد
.
نوررررت
كراكيبك حلوة اوي اوي يا يوتا
علي فكرة انا بزور بلوجك علي طول
انما للأسف مابردش:(
بس بلوجك بيعجبني جدا
اه علي فكرة انا كمان بحب الحواديت اوي اوي اوي
سلام ياقمر
بت ..انتى يا بنت
أنا هاعلق بعدين ..
مش عارفة أعمل حاجة دلوقتى غير إنى ابتسم إبتسامة واسعة أوى أوى
:)))
حبيته أوى البوست ده
قلب ينبض لله
..
مبسوطة اوى ان الكراكيب عجبتك
ومبسوطة اكتر انك بتعدى على طول حتى لو مش بتردى..
ربنا يكرمك على الكلام الجميل ده
ابقى ارمى السلام كده ف الشات بوكس
منورة دايماً
:))))
..
مها
..
اسفه جدا يا مها.. بس كل واحد هنا مسموح له برد واحد بس.. وانتى كده استنفندتى فرصتك.. اوعى اشوفك بتردى ف البوست ده تانى
:DDDDD
انا يا مها تطردينى من سبيسك..يعنى حرف ف غنوة يفرق بيننا.. ياويلك منى
بحبك يا بت انتى
وهاضربك برضو لما اشوفك
;)
Yotta ...
فكرتيني بهبل كتبته لنفسي فترة
أنا معرفنيش ومش شبه بعضي ولما شفتني في الشارع مشبهتش عليا
لا عمري كنت أقرع ولا نزهي ولما قابلتني مسلمتش عليا
:))
تحياتي
دايماً الواحد لما بيسيب حاجة ويروح لحاجة تانية بيبقى خايف..بس الفكرة إن مرحلة الجامعة لما بتخلص بيبقى معناها إنك المفروض إنسان مؤهل أنك تعيش بقى..كإنك لحد الجامعة كنت بتُؤهل إنك تبتدي تعيش، وبعد الجامعة هتبتدي تعيش بقى..الكارثة بقى لو لقيت إن التأهيل اللّي تلقّيته ما كانش كافي! وإنك لسّه غير مؤهل إنك تعيش !
تصدقى فعلا فكرتينى انى القصص واحشتنى اوى ..واحشنى انى انام فى حضن ستى و تحكيلنا الحكايات المرعبة بتاعة العفاريت و احنا صغيرين ....وقصص عمى بتاعة سندريلا و سنوايت اللى كنت بحلم و انا صغيرة البس الفستان بتاعها و البس الجزمة ام كعب و التاج..و القصة اللى انتى حاطاها دى جمييلة اوووووى
عارفة اللى انتى بتحكى فية دة عن حكاية التخرج و كدة دو اللى انا عشتة السنة اللى فاتت بالظبط ..كان جوايا حزن من الامتحانات مش خوف ..وبردوا كان عندى خوف انى اقف محلك سر بعد كدة او انى اخد خطوة و ماتطلعش خطوتى ..و بعد اتخرج مشيت فى طريق حلمى اللى انا من ثانوى بحلم بية لكن دايما لازم تلاقى حد يوقفك و يعد يديكى جرعات احباط جااااااااامدة..اوعى تستسلمى..طريقك ادامك امشى فية و حتى بعد شوية لو حسيتى ان دة مش انتى غيرية انتى قدامك اية ..العمر ادامك و الحياة تجارب و تاكدى ان اى خطوة هتاخديها حتى لو ماكتش بتاعتك هتعلمك حاجة هتفيدك فى خطوتك , فى طريقك, الطريق اللى هو ليكى انتى , ليكى انتى و بس
وبالمناسبة اتاكدى انه سمعك و بيرد عليكى كمان..طالما بتتكلمى بقلبك يبقىهتسمعى بردوا بقلبك
:))
رغم إنها فضفضة
بس عرفت تخليني اقراها لأنها مافيهاش حاجة بتألم غير ان الوحدة بقت بتتقمصنا حتى في ارواحنا فيمكن ده وجعها
ويمكن صدقها وهوا ده اللي بيحصلي كتير
غير إني مؤمنة بحكاية إنك تستدعي أي حد واحشك وتكلميه من جواكي زي اللي عايش في عالم مش اللي فيه لدرجة إني متهيئلي إنه ممكن يحس كلامك من كتر ايمانك بيه
وحتى لو
" حاسة انك سامعنى ومنفض
استمتعت بالحالة جدا
والبوست اللي قبليه هوا سريري بحالته المزرية زي ما ماما مسمياه وتزعق هوا ده ممكن يكون سرير بنت
تحية رغيت كتير
حلو اوى الكلام ده
جميله الفضفضه
وجميل الحوار الداخلى مع نفسك
بتحسى ان اى الفاظ مفهومه او حتى من غير الفاظ
بتحسى ان افكارك بتعبرى عنها بابلغ اسلوب وطريقه
تدوينه جمله
ايه ده مافيش فقره اعلانيه
طيب فاصل اعلانى حتى
غرييييبه
تحياتى
بسم الله الرحمن الرحيم
(رسالة الي كل مسلم)
الرجل الي رسم الكاركاتيروالرسوم المسيئة علي حبيبي وقرة عيني الرسول(ص) قد مات محروقا هوواهل بيته جميعاوالدنمارك تحاول تكتم هذا الخبر.
ارجوكم يا جماعة نشر الخبر لان في اخت مسلمة موحدة مؤمنة من فلسطين رات رؤيا قالت انها رات اللي هينشر الخبر ربنا هيفرحه بعد اربعة ايام ويري السعادة والفرحة في كل شي من حوله (صحته و ماله وبيته)
رجل اسمه الدكتور/ عبدالله مصطفي قال:
شاهدت بعيني الرسول(ص) في منامي واوصاني سلاما علي الناس.
فيجب علي كل مسلم يقرا الرسالة ان يوزعها وينتظر اربعة ايام فسوف يفرح فرحا شديدا واذا لم يوزعها فسوف يحزن حزنا شديدا علي ماله واهله لانه لا يدافع علي رسول الله.
حلو اوى الاسلوب ده و لو انى مش فاهم بتكلمى مين
بس احسن بكتير من انى اكلم نفسى انى اتخيل حد
و انا برضه عندى بعض او كل احاسيس التخرج دى
و برضه حكاية السكوت و الاستماع
بوست حلو
و تحياتى
مش كل الناس بياخدوا الصمت ده علي انه طبع
بعض الناس عندهم طالما انتي قاعدة يبقي لازم تتكلمي
اكيد صحابك حيتعودوا علي صمتك
مسألة المستقبل دي بقي حاجة في علم الغيب
احنا نعمل اللي علينا ومحدش عارف الخير فين
جميل جدا اسلوبك في الحكاية
أكيد ولازم يكون سمعك
وباذن الله حيرد عليكي
استني رده
سلاماتي
سلامو عليكو
بوست جميل
بجد منتهى البراءه
انا عشت معاك الحدوته
سلاااااااام
تعرفى ان انا اول مره مش عرفش اجيب حاجه اقلها على الموضوع
بس حاسس انه قريب اوى يمكن علشان قريب منك قرب لناس بسرعه
نفسى اعرف اتكلم مع نفسى كده مع انى علطول عايش مع نفسى بس مبنكلمش بعض كل واحد ليه اهتمامت غير التانى اللى هو انا برده
متقلقيش فى مجنين تانى كتير وانا اولهم
ياااه
ذكرتيني بأشياء كنت نسيتها كأنك بتحكي عني بالزبط من سنتين لما جيت أتخرج
بس بحب أحكيلك انو بيجوز تتخرجي و تاخدي اللي بدك ياه و تضلي تسألي حالك نفس الأسئله و تلفي في نفس الدوامه زي ما بعمل أنا هلأ
مرات ما بنختار حياتنا هي اللي بتختارنا بس الأهم من هيك انو نكون راضيين عن حالنا
و هو صعب الرضا يتحقق لأنو اللي بيناسبك دي لوقتي ما بيعود يناسبك بعدين لأنو العمر بيلعب دور
معادلة صعبه مش هيك؟؟!!!
آخر فصل في الجامعه فعلا مدعاه لتساؤلات كتير و كمان لما تتخرجي الناس بيبطلو يعاملوكي معاملة النص النص زي زمان
اللي هي معاملة "انتا نص مسؤول نص مش مسؤول"
كل مرحله و الها التزاماتها و "ذاكري كويس"
تدوينه جميله جدا و معبره حبيتها
فعلا بريئه والمدونه جميله جدا
تحياتى
صديق تخيلى...!
بتمنى فعلا يكون سامعك وفاهمك
اقرى دى عندى
http://dandana87.blogspot.com/2007/02/blog-post_21.html
قصة القمر بتاعة وليد طاهر فكرتنى بنفسى
انا كمان عندى علاقة صداقة مع القمر...وما احلاه صديق
زى ما سارةفى نون بتقول بالظبط..لسا فيه سحر فى العالم
عبد الله
..
ازيك ..ايه اللى حصل ف مدونتك.. نقلت وغيرت وحركات
اللى انا كاتباه فيه تاتش هبل مقدرش انكر
ربنا يكرمك يارب
..
عمرو
..
وده بالظبط اللى انا خايفة منه
حاسه انى هاخلص واترمى ف الشارع
وهيبقى مطلوب منى حاجات خايفه ماكونش قدها
بس الخوف بدأ يقل وبدأت اهدى لما اكتشفت بعد الكام امتحان اللى فاتو ان احتمالات انى اخلص السنه دى اصلا قليله
!
..
sou
..
كلامك عن التجارب والعمر اللى قدامى كله تفاؤل والله ودخل دماغى اول ماقريته
ربنا يكرمك
بس ياريت الدنيا تسمحلى بكده ..انى اجرب وافشل واجرب جديد ..
مبسوطة ان الحدوته عجبتك ..انا بحبها جدا وبحب الموسيقى اللى وراها
..
نهى
..
مبسوطة بكلامك ده جدا والله
ياريت يكون سامع
!
بالنسبه للسرير
فخلاص مالوش حل دلوقتى غير انه يتنسف
احنا فاضيين نوضب
;)
..
ممكن
..
دى برضو ميزة انى باقول اى كلام باقرب طريقة ليا
تتفهم بقى ماتتفهمش مش مشكله
المهم المقصود بالكلام يفهم
وانا متأكده انه فاهم
نورت
..
mr/miss anonymous
..
الف صلاة وسلام على رسول الله
لكن
هو لسه فيه حد بيبعت الكلام ده
يعنى لسه حد بيصدق
!!
عموما لو لسه فيه
فده مش مكانه
شكرا
..
محمد
..
والله ولا انا
فعلا معرفش باكلم مين
يمكن روحى اللى ف اول البوست
او القمر اللى ف الحدوته اللى ف اخر البوست
او حاجة بين الاتنين دول
نورت يا محمد
..
كريم
..
الفكره ان انا اللى مش قادرة اتعود ع الصمت ده
ودايما حاسه انى بابقى رخمه وانا ساكته
:)
ياريت بس اقدر اعمل اللى عليا ده
ادعيلى معاك
:)
..
سى السيد
..
بابتهج فعلا لما باشوف ردك هنا
يمكن السر ف الصورة
نورت بمرورك السريع
:)
..
الصقر الجارح
..
لا لا اوعو تتخانقو ولا تزعلو مع بعض
انت ليك غير نفسك..ولا هى ليها غيرك
خلو بالكو من بعض
:)
..
مياسى
..
يا هلا بيكى ..كيفك وكيف الاردن
والله كلامك صح ..بس انا مابدى الدنيا تختارلى مكانى..
بدى انا اختار الى اللى باريده..يارب باقدر
ادعيلى
نورتى كتير
ضلى طلى
..
blue wave
..
شكرا لمرورك وردك
نورت
..
ميوية
..
اه يا فاهمانى وفاقسانى انتى
:))
قريت البوست بتاعك
يشبه كتير اللى اقصده
luv u
..
Post a Comment