كان يوم شتــا
وغلطت لما رسمت قلبي ع الحيطان
من غير غطـا
كان ليل طويل من غير قمر
ورق الشجر كان نفسه ينزل م الشجر
نزل المطر
طرد الخريف
كلام قديم كتبته ف شتا من الشتات.. ختامًا لمسلسل الغلطات.. أنا ليه كنت باركز ف غلطاتي اوى كده.. المهم قلت ارميه هنا دلوقتى.. أنا أصلي زهقانة.. نفسي نبطل ضغط.. نبطل ضغط.. نبطل ضغط على بعض.. كفاية الحاجات اللي حوالينا بتضغط من كل ناحيه.. وابطل ضغط على نفسي.. نفسي بجد.. مين من حقه يحكم ويقول ده صح وده غلط.. اللي حد شايفه غلط انا ممكن اشوفه صح والعكس.. كفاية كفاية.. كفاية.. مش لازم افترض الغلط الأول على كل حاجة بتتعمل .. مش لازم اركز كده وانسى الحاجات الكبيرة المهمة.. إتفوه بجد.. بالمناسبة .. أنا مش مؤمنة بفكرة "المفروض نتصرف كناس عاقلين.. كناضجين" أصل "كـَ" هنا متنفعش.. ما هو يا نبقى ناضجين فعلاً يا إما لأ.. يعنى مثلاً أنا باتصرف زى ما باتصرف.. باللي وصلت له لغاية دلوقتى.. بسني وأفكاري.. باتصرف بقدر المعرفة اللى عندى وقد تجاربي.. مينفعش امثل انى انضج من اللى وصلت له.. وليه أصلاً.. مش شايفة داعي اني ابذل مجهود في تجميل تصرفاتي وبروزتها عشان تبدو ناضجة.. تطلع ناضجة تطلع نص سوى.. مش مهم.. إيه قيمتها ساعتها وهي مش حقيقية ومن جوايا فعلاً.. أنا باتصرف زي ما باتصرف.. زي ما "أنا".. وده المهم (كويس وصلت لحاجة مهمة).. أنا نفسي ف حاجة.. حاجة واحدة تخليني احب الدنيا..حاجة اتعود اعملها.. مثلاً اتعود اشوف اصحابي كلهم يوم معين في الشهر حتى.. أو اتعود أول ما اصحى الصبح أقول حاجة جميلة زي "ياريت النهارده يكون يوم طيب معايا".. محتاجة اتعرف على ناس مجانين غريبين الأطوار.. واحكى معاهم فى كل حاجة.. أو حد جديد تمامًا ف دنيتي واسمر احبه يوم واحد ف الاسبوع واسميه النيل وباقية الأيام يختفي كأنه مش ف الدنيا أصلاً.. أنا مستحملة نفسي بالعافية مش هاستحمل حد طول الاسبوع.. أو ناس عواجيز ويكلموني ف أي كلام.. أو أقرا كتاب جديد مختلف تمامًا.. لكاتب مغمور من التمانينات .. ويطلع مالوش حل وشبهي جدًا وقريب.. أو اكتشف غنوة قديمة مغلوشة ومحدش يعرفها واحبها وتبقى بتاعتي.. أنا تقريبًا عايزة اكتب كلام تاني خالص غير اللي اتكتب.. معرفوش.. ولا مش فاكراه باين..أنا عايزة أقوللي اني ممكن اجي اكتب هنا ف أي وقت.. وأكتب أي كلام.. وممكن ماجيش خالص وماكتبش خالص.. انا معايا الفرصة.. مش هاقلق بقى..
أنا نفسي ف ليـــل.. وأنسى كل ده.. وافضل كده سرحــــــانـــــه ف الــولا حــــاجــة
5 comments:
أنتى ايه حكايتك مع الترجمة ومعايا
يا مي
ده تهييس ليلي
ماتركزيش معاه كتير :D :D
أزاى بس ماركزش
طيب حتى من غير الترجمة
انا أصلا بحب تهييسك ..ولما تيجى تكبى حاجة هنا
يبقى ازاى بس ماركزش
حلو قوي النص دا يا آية ... بقى لي مدة ما جيتش هنا بس .. أنا حاسس كتابتك اختلفت للأحسن
...
الشعر اللي قبل النص دا بتاعك ؟
هو حلو جدا برضه
أحمد..
أيوه النص اللي ف البداية بتاعي برضو :)
طبعاً رأيك أسعدني جداً بجد..
أحب انك تيجي دايماً هنا..
:)
Post a Comment