تهييس ما بعد الامتحان

-أولآ مساااااء الخيييييير على كل اللى بيعدى من هنا -(ده اذا كان فيه حد بيعدى أصلا)0...
ثانيا أنا ماكنتش ناوية أبدآ تكون دى أول تدوينة ليا بس فيه كلمتين عايزة أقولهم لأى حد أو حتى لنفسى ،،،
وقلت أكتبهم هنا كنوع من التغيير مش أكتر..
civilizationالحكاية ومافيها انى حليت زى الزفت (لامؤاخذة مش لاقية كلمة مؤدبة) فى امتحان ال
يعنى الحضارة..
ورجعت وأنا بأسأل نفسى السؤال العبقرى ده "ياترى ايه السبب؟"
وعشان أسهلها على نفسى اديتلها حبة اختيارات:

كنت باستهبل كتير وماذاكرتش كويس-1

2-ماكنش فيه وقت.
.4-أصابنى الزهايمر وأنا فى عز شبابى ومابقيتش أعرف أصم زى زمان.
(أنا أصلا ماكنتش بأعرف أصم زمان).
3-المادة طويلة وما أعرفلهاش أول من آخر.
5-جميع ما سبق.
و عشان نفسى ما بتحبش تكدب عليا فاختارت الاجابة الاخيرة..

آه..بصراحة ضيعت وقت كتير..
بس أنا كده ماباعرفش أقعد وشى فى الورق طول اليوم..يعنى حبة مذاكرة وحبة أى حاجة تانية (قراءة- نت-
بس المادة دى بالذات ماكانش ينفع معاها أى حاجة تانية خالص لأنها طويلة ومكلكعة ..
يعنى عايزة حد من الناس الدحيحة اللى بيعشقوا المذاكرة..

وبالنسبة للزهايمر فطبعا لازم ييجى لى زهايمر..
واحدة بقالها 11سنة بتدرس فى مدارس مصر المحروتة..دماغى عمالة تتحشى كلام ومعلومات..
ومع ذلك كنت باطلع من الاوائل الحمد لله..
بس الظاهر الواحد خلاص ذاكرته اتملت ع الاخر وبقت تدلدق كمان..
.

انما السؤال التانى والأهم واللى مش باسأله لنفسى لأنه هو اللى بيطرح نفسه لوحده..
ليه المادة دى مالهاش كتاب؟؟
حضارة" يعنى تاريخ يعنى كلام كتير كله حقائق ماينفعش نألف فيها."
وتوصلت أخيرآ للاجابة وهى ،،
لو المادة دى ليها كتاب ، الكتاب ده هيكون عائق يمنع المادة من تحقيق أهم أهدافها وهو: تعليم الطالب-اللى هو سعادتى- ان مافيش حاجة تيجى كده..يعنى وما نيل المطالب بالتمنى..يعنى محدش بياكلها بالساهل..
وده من خلال ايدى اللى بتفضل طول المحاضرة تجرى ورا الدكتورة عشان تلحق تكتب وعلى آخر المحاضرة بتبقى من غير صوابع بعد ما تكون كتبت حوالى ست سبع صفحات فلوسكاب فى ساعتين..
والمطلوب منى بعد كده انى أصم كل المحاضرات دى قبل الامتحان ،وبالتالى بأنساها وأنا بأسلم الورقة (ده اذا ما نسيتهاش وأنا فى الامتحان زى المرة دى).
يلا حصل خير..وزى ماقال اسمه ايه ده "ماتعيطش على اللبن المدلوق"

وختاما أحب أهديلى الغنوة دى..الفرح شاطر ..والحزن شاطر
وأنا لسة قادر فى الحزن أفرح.. وده المهم.

خلاص والله أنا عارفة انى رغيت كتير..بس فاضل كلمتين..
واحدة لابراهيم اللى بيتوقعلى مستقبل باهر فى ظل الحكومة الجديدة ويشهد على الكلام ده الشات بوكس:
أحب أقولك يا ابراهيم ان المستحيلات أربعة: الغول والعنقاء والخل الوفى
ومستقبل باهر فى ظل نظام تعليم فاشل عاوزله زمن عشان يتغير-أكون أنا انتقلت الى رحمة الله- ده اذا كانوا أصلا ناويين يغيروه..

و التانية لملكة:
ملوكتشى
عايزة أقولك انى ماسمعتش أى حاجة من مكالمة الموبايل اللى بعد الامتحان بس اللى فهمته انك حليتى كويس يعنى
بركة يا حبيبتشى وعقبال الامتحانات اللى جاية
هانت ..فات امتحان ومافاضلش غير ستة..بسيطة ان شاء الله..
بذمتك يرضى حد يكون ده موضوع أول تدوينة؟؟!!
يلا كلنا لها

------------------

ملحوظة :الكلام اللى فات كان مجرد تهييس
وما التدوينة الا حبة تهييس

--------------------