سيبونى أحلم

ا" لا تجعل من أمانيك مبعثاً لشقائك ومورداً لتعاستك، بل الفظها اذا ما أحسست منها بوادر حرمان، تمن لتنال وتسعد ولا تتمن لتحرم وتشقى "ا

(يوسف السباعى- هذه النفوس..هذه الحياة)

كلام جميل جداً.. ماشى
!والعقل بيقول كده؟ ...يمكن
بس أنا مش عارفة أعمل كده ..أو يمكن مش عايزة
..أحلامى دايماً مجنونة وكبيرة وفوق طاقتى.. وأنا عارفة انى مش هأقدر أحقق منها كتير
وخصوصاً اليومين دول..يمكن عشان كل ما الدنيا بتقفل فى وشى
بأفتح أنا باب الأحلام على آخره
وألاقى الأحلام بتكبر وبتتضخم لوحدها
..بس أنا مش عارفة أحلم بغيرها.. مش عارفة أحلم على قدى وعلى قد اللى أقدر أحققه

لما كنت قاعدة مع زوزو (صاحبتشى) ف الساقية.. بنتكلم عن أحلامنا فى المستقبل والذى منه..لقيتنى طول ما أنا بأتكلم بأقولها أنا ...عايزة...وعايزة..وعايزة..وعايزة
..عايزة حاجات كتير أوى
!!..ولقيتها بترد عليا بتقوللى.. يا بنتى مش كده..ارضى باللى انتى فيه..ناس كتير بتتمنى تعيش زيك..الأحلام الكتير دى مش صح
أرضى..؟؟
هو معنى انى أحلم (زيادة شوية عن الطبيعى) أو يعنى نفسى ف حاجات كتير انى مش راضية؟؟
أنا عارفة انى عايشة كويس والحمد لله.. بس مش هى دى الحياة اللى أنا عايزة أعيشها.. بأحلم أغير حاجات كتير
..بأطمح مش بأطمع.. والفرق كبير
و يعنى ايه الأحلام الكتير مش صح؟
.أنا عايزة أحلم كتير ..والمهم أكون حاطة الاحتمالين فى الاعتبار ان أحلامى الكتير دى ممكن تتحقق وممكن لأ

..أنا بأبقى مبسوطة وأنا بأحلم
القدرة على الحلم" دى نعمة..مش عند كل الناس..لازم نحمد ربنا عليها"
..فيه ناس ما بتقدرش تحلم
..وفيه ناس مابتحلمش غير باللى تقدر تحققه
..و ناس أحلامها بتتعدى قدراتها أحياناً..وأنا مبسوطة انى منهم
اللحظة اللى بأحلم فيها دى.. لحظة تخيل حدوث المستحيل -مجرد تخيله- لحظة بحبها.. بتسعدنى

حرية الحلم" كمان نعمة "
الحلم حرية.. فى الحلم حرية.. الحلم حر..
ماأعرفش تتقال ازاى
القصد انى عمرى ماحسيت بقيود فى أحلامى..
مهماكنت بأتصدم أحياناً بالواقع..اللى مش هيسمح لى أحقق كل الأحلام دى
بس برضو بأحب أحلم بحرية كده.. وأستمتع بحريتى فى الحلم
أحسها أوى
أحس أد ايه أنا حرة و أنا بأحلم
وأقدر أحلم بأى حاجة و ف أى مكان و أى زمان
!!..وماحدش يقدر يمنعنى انى أحلم.. ولا حد يقدر يتهمنى بانى بأحلم حلم مش على مزاجه

.."وحتى الواقع ده يمكن بيصدمنا أحياناً.. ويمكن يمنعنا من "تحقيق أحلامنا
.."لكن عمره ما يمنعنا اننا "نحلم
..احنا اللى بنمنع نفسنا أحياناً من الحلم
..لما بنلاقى الظروف ضدنا ومش مساعدانا على تحقيق أحلامنا
وما بنرضاش نحلم بحاجة مش هنقدر نحققها فى الواقع،
هل ده سبب كافى اننا مانحلمش؟؟
"وهل ده هو هدفنا الوحيد من الحلم اننا "نحققه
..الحلم(بالنسبة لى يعنى) فى حد ذاته هدف
.. الحلم للحلم..أنا بأحلم لأنى عايزة أحلم
..لأنى بأبقى مبسوطة بالحالة دى
فى الحلم أصير عالية*...
بيضاء كالغيوم
سعيدة كالأطفال

يمكن تكون جملة يوسف السباعى أكثر واقعية أو عقلانية من التخاريف اللى أنا بأقولها دى
و أكيد بأحترم كلامه جداً و بأحترم الطريقة الواقعية المنطقية دى فى التفكير و بأحاول اتبعها فى أمور كتير فى حياتى
..الا فى الحلم ..لأنه ساعتها مش هيبقى حلم و هيفقد معناه

ساعات والله كده وأنا بأحلم بحاجة مش ممكن تتحقق أو صعب يعنى
وأقعد أتخيل كل تفاصيلها
ألاقى حاجة بتفوقنى بتقوللى كفاية كده اللى انتى بتحلمى بيه ده لايمكن يحصل
بس بألاقى حاجة تانية أقوى منها بتقوللى كملى
..واحلمى براحتك

أنا عايزة أحلم أحلام كتير..أحلام على قدى وأحلام أكبر منى.. يمكن تتحقق ويمكن لأ
ومش عايزة حد يتريق على أحلامى وأنا بأحكيلة عنها
..ولا عايزة حد يفوقنى بجردل الميه الساقعة.. ع الأقل يدفيها شويه
..عايزة أفضل أحلم.. وأعيش عشان أحقق أحلامى
..لو حققتها أبقى وصلت للى أنا بأحلم بيه
..لو ما حققتهاش أبقى ع الأقل حلمت باللى أنا عايزاه.. وعشت وعملت كل اللى نفسى أعمله فى الحلم
..سيبونى أحلم بأه
!..سيبونى أحلم وخلاص

___________________

من قصيدة (الأرق) لسنية صالح*

________________________